تاند (د کب/ حوت ۲ مه) یوې نوې طبي څېړنې ښودلې چې د عمر له زیاتېدو سره سره، د ذهن یا دماغ د تېز او فعال ساتلو لپاره لوستل، لیکل او یا د نوې ژبې زده کړه ډېره ګټه لري.
د امریکا د رش پوهنتون طبي مرکز د څېړنې له مخې، دا ډول فعالیتونه د دماغي زوال (ډیمنشیا) خطر په څرګند ډول کموي.
د څېړنې مهم ټکي:
- ډیمنشیا یوه داسې ناروغي ده چې تر اوسه یې بشپړه درملنه نشته.
- اټکل کېږي چې تر ۲۰۵۰ کال پورې به په ټوله نړۍ کې د ډیمنشیا ناروغان له ۱۵۰ میلیونو څخه زیات شي.
- په دې څېړنه کې ۱۹۳۹ کسان شامل وو چې منځنی عمر یې ۸۰ کاله و.
- دې کسانو د څېړنې په پیل کې د ډیمنشیا ناروغي نه لرله.
- د هغوی روغتیا او ذهني فعالیتونه د ۸ کلونو لپاره وڅارل شول.
څېړنې څه وموندل؟
څېړنې څرګنده کړه، هغه کسان چې د لوست، لیک، یا د نوې ژبې زده کړې ته یې دوام ورکړی و، په هغوی کې:
- د ډیمنشیا خطر ۳۸ سلنه کم و
- د سپک ذهني زوال خطر ۳۶ سلنه کم و
د څېړونکو نظر:
څېړونکي وایي چې په هر عمر کې د دماغ فعال ساتونکي کارونه کولی شي د ذهني زوال مخه ونیسي.
د دې څېړنې پایلې په Neurology علمي مجله کې خپرې شوې دي.