تاند (چهارشنبه، د سلواغې/ دلوې ۸ مه) د عامې روغتیا وزارت اعلان کړی چې هند کابل ته ۲.۵ ټنه درمل لېږلي دي، چې د سرطان له ناروغانو سره مرسته وشي او د درملنې خدمتونه پیاوړي شي.
د طالبانو تر کنټرول لاندې د افغانستان د عامې روغتیا وزارت دا درمل د سرطان د درملنې لپاره ډېر مهم بللي او ویلي یې دي چې د تخنیکي او د څارنې د پروسو تر بشپړېدو وروسته به دا درمل روغتیايي مرکزونو ته ووېشل شي.
د هند د بهرنیو چارو وزارت مخکې ویلي و چې د بشري مرستو د دوامداره ژمنو په لړ کې به د اوږدې مودې لپاره د افغانستان د درملو اړتیاوې پوره کوي.
له هغه راهیسې چې طالبان د ۲۰۲۱ کال د اګست په میاشت کې بېرته واک ته رسېدلي، په داسې حال کې چې نړیوالې مرستې کمې شوې دي هند د افغانستان لپاره یو مهم روغتیايي شریک ګرځېدلی او اړین درمل او طبي وسایل یې برابر کړي.
هند بشري سره له دې چې د طالبانو حکومت په رسميت نه دی پېژندلی، خو بیا یې هم له افغانستان سره بشري مرستو ته دوام ورکړی دی.
د چارو کتونکي وايي، دا د نوې ډیلي د دې تګلارې ښکارندويي کوي چې د افغانستان له خلکو سره اړیکې وساتي او خپلې سیمهییز ګټې خوندي کړي.
د افغانستان د روغتیا سیستم له جدي ستونزو سره مخامخ دی، لکه د درملو د کموالي، د طبي وسایلو د نشتوالي، د مسلکي ډاکترانو د وتلو له کبله د کموالي (brain drain)، او د مناسبو روغتیايي اسانتیاوو د کمښت په برخو کې.
په هېواد کې د سرطان کچه لوړه ده خو د انکولوژۍ (سرطان درملنې) خدمات محدود دي، له همدې امله نړیوالې درملیزې مرستې د هغو ناروغانو لپاره خورا حیاتي دي چې د اوسني اقتصادي بحران له امله نه شي کولی درملنه ترلاسه کړي یا ځانګړو خدماتو ته لاسرسی ولري.
هند د ډسمبر په میاشت کې کابل ته ۷۳ ټنه ژوند ژغورونکي درمل، واکسینونه او اړین طبي توکي ولېږل، چې دا افغانستان ته د دوامدارو طبي مرستو څرګندونه کوي.