تاند ( سه شنبه د سلواغې ـ دلوې ۷مه) د طالبانو د حکومت د ریاست الورزا اقتصادي مرستیال ملا عبدالغني برادر په مشرۍ د ملي تدارکاتو کمېسیون په نننۍ غونډه کې د ۲،۵ میلیارډ افغانیو په لګښت ۲۱ پروژې منظور شوې.
یادې غونډې ته د منظورۍ له پاره ۳۳ پروژې وړاندې شوې وې.
د دغو پروژو له ډلې یې ۲۱ منظور، ۷ تعدیل، ۲ د بیا مذاکراتو له پاره اړوندو کمېټو ته سپارل شوي، یوه ځنډول شوې، یوه بیا ځلې داوطلبۍ ته وړاندې شوې او وروستۍ یې د ځینو نیمګړتیاوو له امله لغوه شوه.
یاد معاونیت وایي چې، په منظور شوو پروژو کې د کابل، هرات، ننګرهار، بلخ او خوست هوايي ډګرونو له پاره د سکېنرونو اخیستل، د ګردېز- خوست عمومي سړک جوړول شامل دي.
دغه راز د هیواد په نهو ولایتونو کې د ولسوالیو په کچه د نهو عمومي روغتونونو جوړول، د دولتي ودانیو جوړول او د هیواد په یو شمېر ولایتونو کې د برېښنا پروژې هم شاملې دي.