افغانستان او ايران کډ دښمنان لري. د سيمې او نړۍ حالاتو ته په کتلو سره، اوس يې وخت دی چې د کډ دښمن د توطئو د خنثی کولو لپاره افغانستان او ايران يو له بل سره مرسته وکړي. د دواړو هېوادونو تر ټولو لوی دښمن د امريکا هېواد دی. د امريکا تر څنګ، غربي نړۍ هم په عامه توګه د دواړو هېوادونو سره کرکه کوي، او سترګې يې دې ته نيولې دي چې څه وخت فرصت پيدا کړي تر څو د افغانستان او ايران اسلامي حکومتونه ړنګ او طبيعي زيرمې يې چور او چپاول کړي. که د امريکا په استازيتوب، اسرائيل ايران ته ستونزې جوړوي، دلته بيا د امريکا په استازيتوب د پاکستان پوځي رژيم افغانستان ته ستونزې جوړوي. د ګډ دښمن د هڅو د ناکامولو تر ټولو مؤثره لاره د افغانستان او ايران تر منځ تعاون او ژور تعامل دی.
حالاتو ته په کتلو سره، سړی دا ويلی سي که د ايران اسلامي جمهوريت سقوط وکړي (که څه هم د دې کار امکان ډېر لږ دی)، د افغانستان ستونزې به لا هم ډېرې سي. زموږ يوې خوا ته د پاکستان پوځي رژيم له وړاندې لا د امريکا رژیم ټينګ ملګری دی، او چمتو دی چې بيا د ترهګرۍ سره د جنګ تر نامه لاندې په افغانستان کې د مداخلې لپاره د امريکا څخه ډالر واخلي، او يا کېدای سي وختي يې ډالر اخيستي وي.
که په ايران کې اسلامي جمهوريت سقوط وکړي، ځای به يې د امريکا او اسرائيل یو لاس پوڅی رژيم ونيسي. د پاکستان او ايران د لاس پوڅو رژیمونه په وسيله به امريکا افغانستان د دوو خواوو څخه راګير کړي، چې په نتيجه کې به افغانستان او په خاصه توګه زموږ اقتصاد ته نور هم زيان راورسيږي.
ځکه، د اوس لپاره هره مرسته چې د افغانستان د لاسه پوره وي، په خاصه توګه په هغه حالت کې چې امريکا پر ايران باندې بريد وکړي، بايد د ایران سره يې وکړي. هره مرسته چې د افغانستان د لاسه پوره وي، که څه هم دا مرسته يوه مرمۍ يا يو غړپ اوبه وي. دې غټو مسائلو ته په کتلو سره، د ايران سره پر اوبو اختلاف يا د مهاجرينو شړل ډیرې کوچنۍ مسئلې دي، او اصلا د مقايسې وړ نه دي.
په متقابله توګه، په يو مناسب وخت کې، افغانستان بايد د ایران څخه د ډرون (بېپيلوټه الوتکو)، ميزائل او دافع هوا په برخه کې مرسته تر لاسه کړي. دا په دې خاطر يو مهم کار دی چې تر څو د افغانستان څخه د پاکستان پوځي رژيم او په سيمه کې د امريکا اډو ته غواښ متوجه نوي، د امريکا الوتکې به د پاکستان د لارې همېشه زموږ هوايي حریم نقضوي. که يې امکان وي، افغانستان دې د ايران او د يمن د انصار الله سره ګډ دفاعي تړون هم لاسليک کړي. غربي نړۍ د زوال او سقوط په حالت کې ده. د غرب لاسونه د مظلومو مسلمانانو او په خاصه توګه د مظلومو فلسطينيانو په وينو ککړ دي. د غرب سره د ښه روابطو پر ځای، افغانستان دې د سيمې د هېوادونو او د مقاومت د محور سره خپل روابط پياوړي کړي. د مقاومت د محور په سر کې ايران قرار لري. د افغانستان تر څنګ، ايران د سيمې هغه يوازینی هېواد دی چې په کښې د امريکا پوځيان او پوځي اډې نه شته. نو ځکه دواړه هېوادونه ګډ دښمنان او ګډې ګټې لري، او بايد چې يو له بل سره مرسته وکړي.