تاند (چهارشنبه، د جدي/ مرغومې ۱۰ مه) په چین کې د یوه نندارتون په ترڅ کې یوه بده پېښه وشوه، چې پکې یوه ماشوم په بې پامۍ د سرو زرو یو قیمتي تاج، چې دوه کیلوګرامه وزن یې درلود، مات کړ. د دې تاج بیه نژدې ۲ لکه او ۸۰ زره امریکايي ډالر ښودل شوې ده.
د راپورونو له مخې ماشوم له خپلې کورنۍ سره نندارتون ته تللی و او په تېروتنه یې د تاج له حفاظتي کیس سره ټکر وکړ، چې له امله یې کیس واوښت او تاج پر ځمکه ولوېد او مات شو.
دا پېښه د چین یوې مشهوره انفلونسرې ژېنګ کایې پر ټولنیزو رسنیو شریکه کړې ده.
هغې ویلي چې دا تاج د واده د ډالۍ په توګه د هغې مېړه جوړ کړی و او د دې لپاره یې احساساتي ارزښت درلود.
د پېښې ویډیو پر ټولنیزو رسنیو خپره شوې، او ژېنګ کایې ویلي چې دې پېښې هغې ته سخته روحي صدمه رسولې ده.