تاند ( شنبه د لیندۍ ـ قوس ۱۵مه) اسټرالیا د بشري حقونو د سرغړونو، په ځانګړي ډول د ښځو او نجونو د حقونو د محدودولو له امله، افغانستان کې د طالبانو د حکومت څلور لوړرتبه چارواکي د مالي بندیزونو او د سفر له بندیز سره مخ کړل.
د یاد هېواد د بهرنیو چارو وزیر، پیني وانګ ویلي چې یاد کسان افغانستان کې د ښځو او نجونو په ځپلو، د اقلیتونو په ځورولو او د قانون د حاکمیت او ښې حکومتولۍ په کمزوري کولو کې مستقیم رول لري.
په دې تړاو خپره شوې خبرپاڼه کې ویل شوي چې، بندیزونه د طالبانو پر درېیو وزیرانو او د دې ډلې د سترې محکمې پر رییس لګېدلي دي.
په دې کسانو کې د طالبانو د امربالمعروف وزیر خالد حنفي، د لوړو زده کړو وزیر ندا محمد ندیم، د عدلیې وزیر عبدالحکیم شرعي او د سترې محکمې رییس عبدالحکیم حقاني شامل دي.
د اسټرالیا د بهرنیو چارو وزیرې ویلي دا اقدامات د اسټرالیا د نویو قانوني صلاحیتونو پر اساس شوي، څو له دغې لارې د بشري حقونو د سرغړونو له امله پر طالبانو فشار زیات کړي.