تاند ( چهارشنبه د لیندۍ ـ قوس ۱۲مه) د طالبانو د ریاستالوزراء اقتصادي مرستیال ملا عبدالغني برادر نن په کابل کې د ایران د روغتیا وزارت مرستیال سره کتلي.
د طالبانو اقتصادي معاونیت د ایران روغتیا وزارت مرستیال له قوله لیکلي، ایران چمتو دی له افغانستان سره د درملو او طبي وسایلو د تولید او افغانستان ته د صادراتو د زیاتوالي برخه کې خپله همکاري د اوږدمهال لپاره پراخې کړي.
اقتصادي مرستیال ډاډ ورکړی، چې په یادو برخو کې به د طالبانو اړوندې ادارې پوره همکاري او ګډ کار وکړي.
دا خبر داسې مهال خپرېږي چې، کابو میاشت کېږي له پاکستان سره د افغانستان هر ډول سوداګري په ځانګړي ډول د درملو صادرات بشپړ بند شوي دي.
دغه راز د یوه بل خبر له مخې د طالبانو د کرنې، اوبولګولو او مالدارۍ وزارت خبر ورکړی، چې د ازبکستان کرنې وزارت مرستیال جمشید عبدوذوکروف په مشرۍ د یاد هېواد خصوصي سکټور د استازو راغلي پلاوي د افغانستان کرنیزو متشبثینو او خصوصي سکټور سره څو سوداګریز تړونونه لاسلیک کړي.
دغه قراردادونه د خوراکي توکو صادراتو او وارداتو برخه کې د همکاریو پراختیا چې سابه، غوښه او نور خوارکي توکي شامل دي لاسلیک شوي.
د هوکړو له مخې دواړه لوريو ژمنه کړې، چې د دواړو هېوادونو د نافذه اصولو او مقرراتو سره سم به خپلې سوداګریزې اړیکې پراخې او صادراتي او وارداتي توکو لېږد رالېږد پروسه به لا پیاوړې کوي.