د ناکامورا د وژل کېدو پنځه کاله پوره شول

تاند:(پنجشنبه، د لیندۍ/ قوس ۱۳مه) ‏نن د جاپاني الاصله خدمتګار ډاکټر ناکامورا د وژل کیدو شپږم تلین دی.

نوموړی ۵ کاله مخکې په جلال اباد کې د ناڅرګندو کسانو له لوري ووژل شو.

دغه جاپاني ډاکټر، چې د افغانستان په ختیځ کې ېې د اوبو د مدیریت لپاره مهمې پروژې عملي کړې وې، په وروستيو کې ېې د کونړ سيند د اوبو د مدیریت پروژې په پام کې وې.

په ولسي جرګه کې د ننګرهار پخواني استازي حاجي عبدالظاهر قدير د نوموړي د وژل کیدو پړه هغه مهال پر پاکستان واچوله.

د ننګرهار پخواني والي شاه محمود میاخیل ويلي، چې د ناکامورا د قتل په تور نیول شوي کسان د پاکستان د تحريک طالبان اړوند وو او افغان طالبانو هم مرسته ورسره کړې وه.

طالبانو په دې اړه څه نه دي ويلي.

وروسته په افغانستان کې د جاپان سفارت په يوه اعلاميه کې وویل:«که څه هم له بده مرغه هغه وفات شو، خو د هغه پروژې د هغه د افغان او جاپاني همکارانو له خوا دوام لري.»

د جاپان سفارت زياتوي، چې دوی به له افغان ولس سره خپلو مرستو ته دوام ورکړي.

د جاپان سفارت په اعلامیه کې راغلي:«موږ غواړو د هغه طریقې د افغانستان نورو برخو ته هم ورسوو. د هغه روح هیڅکله نه مړ کیږي.»