تاند، دوشنبه، د جوزا ۵مه: د امریکا د بهرنیو چارو وزیر ولسمشر غني ته زنګ وهلی او د ۲ زره طالب بندیانو د خوشې کولو په تړاو یې د ولسسمشر د اعلان ستاینه کړې ده.
ولسمشر غني نن دوشنبه په یو ټویټ کې ویلي، ښاغلي پمپیو تېره شپه له ده او عبدالله سره تلفوني تماس نیولی او د دې پرېکړې هرکلی یې کړی چې ولسمشر غني د ۲ زره طالبانو د خوشې کولو اعلان کړی دی.
ولسمشر غني وايي، مایک پمپیو ورته ډاډ ورکړی دی چې امریکا په افغانستان کې د دوامداره اوربند او د مخامخ مذاکراتو په لټه کې ده.
ولسمشر غني وايي، مایک پمپیو ورسره په خبرو کې د درې ورځني اوربند هرکلی او ستاینه هم کړې ده.
دا په داسې حال کې ده چې د طالبانو لخوا د اختریز اوربند تر اعلان وروسته افغان حکومت د متقابل اوربند تر څنګ د ۲ زره طالب زندانیانود چټکې ازادۍ خبر هم ورکړی دی.
دا پروسه چې د ۱۰۰۰ طالبانو او ۲۶۱ حکومتي بندیانو تر تبادلې وروسته دتاوتریخوالي د شدت له کبله درېدلې وه، پر یو ځل بیا پيل یې طالبانو هیله مندي ښودلې او دا یې د افغاني مذاکراتو لپاره مهم ګام بللی دی.