تاند (دوشنبه، د جوزا ۵مه) د امریکا دفاع وزارت وايي، یو پوځي یې د تېرې اوونۍ د سې شنبې په ورځ (مې۱۹) د افغانستان په بګرام هوايي اډه کې وژل شوی دی.
پینتاګون د دغه سرتېري عکس هم خپور کړی او ویلي یې دي چې ۲۵ کلن تریفاریس رافن باومن له جګړې سره په اړونده پېښه کې وژل شوی دی.
دې وزارت ویلي چې د دغه عسکر د وژل کېدو د څرنګوالي په اړه څېړنه کوي خو دا یې نه دي ویلي چې په وسله واله نښته کې وژل شوی او که په بمي چاودنه کې.
نوموړی د جنوبي کارولینا د ملي ګارډ غړی و او افغانستان ته د فریډم سینټاینل عملیاتو لپاره استول شوی و.
امریکا له نسبتاً یوې اوږدې مودې وروسته په افغانستان کې د خپل یوه پوځي د وژل کېدو خبر ورکوي.
د آی کژولڼي د راپور له مخې، سږ کال تراوسه پورې په افغانستان کې ۸ امریکايي پوځیان وژل شوي دي.
آی کژولټي له ۲۰۰۱ م کال راهیسې په افغانستان او عراق کې د امریکايي او نورو نړیوالو ځواکونو د مرګ ژوبلو شمېرنې خپروي.
د دې ویبپاڼې پر اساس تېر کال ۲۶ بهرني پوځیان (۲۴ امریکايي) په افغانستان کې وژل شوي وو. خو تر ټولو ډېر په ۲۰۱۰ م کال کې وژل شوي وو چې شمېر یې ۷۱۰ تنو ته رسېده. په ۲۰۱۰ م کال په افغانستان کې د نړیوالو ځواکونو شمېر نژدې یو نیم لکو ته رسېده.