تاند، دوشنبه، د جوزا ۵مه: د ټایم امریکايي مجلې راپور ورکړی چې د افغانستان جګړه په تاریخ کې دریمه جګړه ده چې تر ټولو زیاتې پیسې پرې مصرف شوې دي.
د راپور له مخې د افغانستان پر جګړه ۱۸ کلونو کې ۹۱۰ میلیارده ډالر مصرف شوي او دا د امریکا د خپل تاریخ تر ټولو اوږده جګړه یادېږي.
راپور وايي، دغه جګړه کې ځینې داسې جنګیالي هم اوس په جګړه بوخت دي چې د پيل پر مهال یې حتی نړۍ ته سترګې هم نه وې غړولې، ځکه خو دا جګړه اوس د امریکا په دایمي جګړه یادېږي.
راپور دویمه نړیواله جګړه د امریکا د تاریخ تر ټولو زیاته لګښت لرونکې جګړه بولي، خو د افغانستان اتلس کلنه جګړه بیا په دې لیست کې دریمه تر ټولو زیات مصرف لرونکې جګړه یادوي.
راپور واييو په دویمه نړیواله جګړه د امریکا ۴ اعشاریه ۶۹ تریلیونه ډالر لګېدلي، همدا راز د عراق په جګړه ۱ اعشاریه صفر یو تریلیون ډالراو د افغانستان په جګړه تر اوسه ۹۱۰ میلیارده ډالر لګول شوي دي چې له دې کبله د افغانستان جګړه دریم مقام لري.
ورپسې په څلورم مقام کې د ویتنام جګړه یاده شوې چې ۳۹۸ اعشاریه ۸۱۸ میلیارده ډالر پرې مصرف شوې دي.
همدا راز د کوریا جګړه، لومړۍ نړیواله جګړه، د خلیج فارس جګړه، د امریکا کورنۍ جګړه، د کنفډریسۍ کورنۍ جګړه، د هسپانیا امریکايي جګړه بیا هغه دي چې په ترتیب سره له پنځم نه تر لسم پورې مقامونه یې نیولي او د امریکا زیاتې پیسې پرې مصرف شوې دي.