تاند (پنجشنبه، د لړم/ عقرب ۸ مه) هند د چابهار بندر لپاره د بندیزونو د معافیت موده د راتلونکي کال تر پیل پورې وغځوله. دا بندر د نوي ډیلي د سیمهییزو اړیکو د پلان لپاره حیاتي ارزښت لري او د افغانستان، منځنۍ آسیا او ختیځې روسیې لپاره د دهلېز په توګه کار کوي.
د اکانومیک ټایمز د راپور له مخې، واشنګټن له نوي ډیلي سره موافقه کړې چې د ایران د چابهار بندر لپاره د بندیزونو معافیت یو ځل بیا وغځوي، چې دا پرېکړه د راتلونکي کال تر لومړیو میاشتو پورې نافذه ده.
چابهار بندر د هند لپاره ستراتیژیک اهمیت لري، ځکه دا هغه یوازینی سمندري دهلېز دی چې هند ته اجازه ورکوي د پاکستان له خاورې له تېرېدو پرته له افغانستان او منځنۍ آسیا سره سوداګریزې او لوژستیکي اړیکې ټینګې کړي.
د دې بندر له لارې هند نه یوازې د سیمې له هېوادونو سره اقتصادي اړیکې پراخوي، بلکې د افغانستان د بیارغونې او سوداګریز ثبات په برخه کې هم مهم رول لوبوي.
کارپوهان وايي، د بندیزونو د معافیت تمدید به د هند لپاره دا ډاډمنه کړي چې د چابهار بندر عملیاتي بهیر پرلهپسې روان وي او د دې هېواد د سیمهییز نفوذ د پیاوړتیا هڅې لا تقویه کړي.