تاند (یکشنبه د لړم ـ عقرب ۴مه) د طالبانو د برېښنا شرکت وایي، له اوزبکستانه د وارداتي برېښنا قطعه شوی مزی بېرته ونښلول شو.
برېښنا شرکت وایي، چې دغه مزی کابو لس ورځې وړاندې د دواړو هېوادونو پوله کې د امو سیند د پاسه پرې شوی و.
د برېښنا شرکت د خبرپاڼې له مخې، ټاکل شوې چې په دې سره د کابل په ګډون د ۱۱ ولایتونو د برېښنا د پرچاوۍ ستونزه حل شي.
افغانستان د اړتیا وړ ډېره برخه برېښنا له نورو واردوي نو له همدې امله یې ښارونه وخت تاوخته د برېښنا د نشتون له امله تیاره وي.
عام افغانان بیا له حاکمو نظامونو ګیله لري او وایي چې، د افغانستان په پرېمانه اوبو کې دوی له خپلې برېښنا برخمن نشول.
عام خلک تمه لري چې طالبان به دا ستونزه حل او ژر به پر کونړ سیند د برېښنا بند چارې پیل کړي، هغه غوښتنه چې ویل کېږي په دې وروستیو کې د پوره کېدو هیلې زیاتې شوي.