تاند (دوشنبه، د تلې/ میزان ۲۸ مه) پاکستاني رسنۍ وايي، د پاکستان او افغانستان د وروستۍ موافقې پر اساس به د دوو هیوادونو ترمنځ سوداګري لارې په راتلونکو ۲۴ تر ۴۸ ساعتونو کې بېرته پرانېستل شي.
دغه پرمختګ یوه ورځ وروسته له هغه وشو چې دواړو ګاونډیو هېوادونو د یوې اوونۍ د خونړیو نښتو وروسته د اوربند هوکړه وکړه.
له موضوع خبرو سرچینو جیونیوز ته ویلي، که نورې لانجې پېښې نه شي، چارواکو موافقه کړې ده چې په خپل منځ کې د تګ راتګ لارې به ژر بېرته خلاصه شي.
د افغانستان او پاکستان ترمنځ له وروستیو شخړو وروسته پاکستان د تلې په ۲۰مه (اکتوبر ۱۲مه) نېټه د تورخم او چمن دروازې وتړلې.
پاکستان عموماً په معمولي پلمه هم خپلې لارې بندوي ځکه چې د افغانستان واردات او صادرات تر ډېره د دغه هیواد پر لارو متکي دي.