تاند (دوشنبه، د تلې/ میزان ۲۸ مه) د سپین بولدک – چمن لار نن (دوشنبه) یوازې د سوداګریزو فعالیتونو لپاره بېرته پرانیستل شوې ده.
پاکستاني رسنیو د دې خبر ترڅنګ ویلي چې د ځینو حساسو موضوعاتو له امله، د عامو وګړو د تګ راتګ اجازه لا هم نه ده ورکړل شوې.
د دواړو هېوادونو د ګمرک او سوداګرۍ اړوند مسوولان خپلو دندو ته ستانه شوي دي.
نن یوازې تشو لاریو ته د تګ اجازه ورکړل شوې، او افغان موټروانانو ته د پاسپورټ او ویزې لرل لازمي ګرځول شوي دي.
د سرچینو په وینا، د همدې شرایطو پر بنسټ به د تورخم لار هم سبا پرانیستل شي، او په دې اړه یو رسمي لیک په اسلاماباد کې د افغانستان سفارت ته استول شوی دی.
نورې درې لارې؛ غلام خان، انګور اډه او خرلاڅي — تر اوسه د فعالېدو په پلان کې نه دي.
د دوو هیوادونو ترمنځ د لارو د بندېدو مخینه
له دې وړاندې، پاکستان د اکتوبر له ۱۲مې راهیسې د افغانستان له حالاتو سره د تاوتریخوالي د زیاتېدو له امله د تورخم او چمن لارې تر نامعلومې مودې پورې بندې کړې، چې له کبله یې د افغانستان د ترانزیټي سوداګرۍ بهیر سخت اغېزمن شو.
په دې اړه د کراچۍ د ګمرکونو د عمومي ریاست له خوا د فدرالي عوایدو د ادارې (FBR) د عملیاتو مشر ته یو مهم لیک استول شوی، چې یوه کاپي یې د ABN News تر لاسه کړې ده.
په لیک کې راغلي، «د هغو بارونو د ترانزیټ پروسه چې افغانستان ته تللې، موقتي درول شوې او دا به تر هغه وخته بنده پاتې وي، څو د پولو عملیات په بشپړ ډول بېرته عادي نه شي.»
په سند کې ویل شوي، «دا پرېکړه د پولو د زیاتې ګڼې ګوڼې، احتمالي خنډونو او د تړل شوو تجارتي توکو د خوندیتوب لپاره شوې ده.»
د لیک له مخې، په دې اړه له بندري ترمینلونو، د تړل شوو لارو ترانسپورتي شرکتونو، افغان کلیرینګ ایجنټانو او د تعقیبي ټکنالوژۍ له ادارو سره هم سلا مشورې شوې دي.
نور په لیک کې راغلي، د تورخم او چمن لارې د ټولو سوداګریزو فعالیتونو لپاره تړل شوې وې، چې له امله یې د افغانستان خوا ته سلګونه روانې ترانزیټي لارۍ د «پولو» په دواړو غاړو کې بند پاتې شوې دي.
پاکستان عموماً پر افغانستان د فشار لپاره له خپلو ترانزیتي لاور د حربې په توګه کار اخلي او د سوداګرۍ ټول اصول تر پښو لاندې کوي.
افغانستان او پاکستان موافقه وکړه چې له ۲۴ تر ۴۸ ساعتونو کې په خپل منځ کې لارې پرانیزي