تاند (دوشنبه د تلې ـ میزان ۲۸مه) د سعودي عربستان د بهرنیو چارو وزارت د طالبانو او پاکستان ترمنځ د سمدستي اوربند د هوکړې هرکلی کړی او دا یې د سیمې د سولې او ثبات په لور یو مثبت ګام بللی دی.
اعلامیه کې ویل شوي چې سعودي عربستان د اوربند د لاسلیک او دایمي سولې د ټینګښت لپاره د کړنلارو د جوړولو هرکلی کوي، چې د دوحې په وروستیو مذاکراتو کې ترسره شوې دي.
اعلامیه کې سعودي د ټولو سیمه ییزو او نړیوالو هڅو ملاتړ کوي چې موخه یې د سولې او ثبات ټینګول دي.
سعودي ژمنه کړې، چې د افغانانو او پاکستان خلکو د سوکالۍ لپاره هڅې کوي.
د طالبانو او پاکستان ترمنځ د څو ورځنۍ نښتې وروسته د قطر او ترکیې په منځګړتوب دوحه کې د دواړو لورو ترمنځ پر اوربند هوکړه شوې، خو د توافق پر محتوا افغانان نیوکې او شکونه لري.
دا په داسې حال کې ده چې سعودي عربستان او پاکستان تېره میاشت د متقابل دفاع امنیتي تړون هم لاسلیک کړ، چې پر هر هېواد برید به پر دواړو هېوادونو ګڼل کېږي.