تاند (یکشنبه د تلې ـ میزان ۲۷) د قطر بهرنیو چارو وزارت په یوه اعلامیه کې ویلي،چې افغانستان او پاکستان سمدستي اوربند وکړ.
اعلامیه کاږي چې دواړو لورو هوکړه وکړه چې داسې میکانیزمونه جوړ کړي چې دایمي سولې او ټیکاو ته لاره هواره کړي.
اعلامیې زیاته کړې چې دغه هوکړه او اوربند د قطر او ترکیې په منځګړیتوب شوی دی.
همدا راز پرېکړه شوې چې په راتلونکو ورځو کې د اوربند د دوام او د هغې د پلي کېدو د باور وړ څارنې لپاره تعقیبي غونډې وشي.
بل لورته د پاکستان د دفاع وزیر، خواجه محمد اصف پر اېکسپاڼه د افغانستان او پاکستان ترمنځ د اوربند د هوکړې په تایید سره ویلي، راتلونکې غونډه به ترکیه کې وي.
خواجه آصف ویلي، د دواړو هېوادونو پلاوي به د روانې اکټوبر میاشتې پر ۲۵مه استانبول کې سره وګوري.
د هغه په وینا به په راتلونکې غونډه کې د اوربند پر ځینو مسایلو تفصیلي خبرې وشي.