تاند (شنبه، د تلې/ میزان ۲۶ مه) افغانستان او پاکستان دواړو تایید کړه چې جګپوړي پلاوي یې د وروستیو شخړو د سوله ییز حل په خاطر د خبرو لپاره دوحې ته رسېدلي دي.
د طالبانو د حکومت ویندوی ذبیح الله مجاهد نن پر خپله ایکسپاڼه (پخواني ټویټر) لیکلي چې د دواړو خواوو ترمنځ خبرې به نن په دوحه کې پیل شي.
له بلې خوا د پاکستان د باندنیو چارو وزارت ویندوی نن وویل چې د دفاع وزیر خواجه اصف په مشرۍ جګپوړی پلای دوحې ته رسېدلی دی.
د افغانستان له لوري د طالبانو دفاع وزیر ملامحمد یعقوب مجاهد د خپل پلاوي مشري کوي.
د پاکستان د باندنیو چارو وزارت ویلي چې پاکستان به په دې خبرو کې له افغانستانه وغواړي چې له خپلې خاورې پاکستان ته د ترهګرۍ د خپرېدو مخه ونیسي خو دا په داسي حال کې ده چې د طالبانو حکومت د پاکستان دا ډول ادعاوې په ځلونو رد کړي او ویلي یې دي چې پاکستان دې خپلې ستونزې په خپله خاوره کې په خپله حل کړي.