تاند (یکشنبه د تلې ـ میزان ۲۰مه) ننګرهار کې د طالبانو د اطلاعاتو او کلتور ریاست د اطلاعاتو امر، قریشي بدلون وايي، پاکستاني لوري نن (یکشنه، د تلې ۲۰مه) د تورخم دروازه د مسافرو، ټرانزیټ او کډوالو پرمخ تړلې ده.
قریشي زیاتوي، پاکستاني لوري د تورخم دروازه د طالبانو د حکومت له لوري پر پاکستاني پوځیانو د غچ اخېستنې عملیاتو په غبرګون کې تړلې ده.
دا دروازه داسې مهال تړل کېږي چې تېره شپه د طالبانو حکومت پر پاکستاني لوري په ۷ ولایتونو کې غچ اخیستونکي بریدونه ترسره کړل او د طالبانو په وینا پاکستاني لوري ته یې درنه مرګ ژوبله او زیان اړولی دی.
پاکستان هم دغه بریدونه تائید کړي دي.
د مالوماتو له مخې دا مهال د تورخم دروازې دواړو لوریو ته سلګونه مسافر، لسګونه بار وړونکي موټر او ناروغان ایسار پاتې دي او له جدي ستونزو سره لاس او ګرېوان دي.
تورخم دروازه وخت ناوخته د پاکستان له لوري په یوه او بله بهانه د هر راز تګ راتګ پر مخ تړل کېږي او د نظر خاوندانو په باور دوی له دې دروازې د فشار په توګه ګټه اخلي.
بل لورته تازه د افغان سولې په برخه کې د امریکا پخواني ځانګړي استازي زلمي خلیلزاد د پاکستاني پوځیانو پر وړاندې د طالبانو وروستي بریدونه غچ اخېستونکي یاد کړي.
هغه په خپله ایکس پآڼه لیکلي چې دا بریدونه پر کابل او پکتیکا د پاکستان د وروستیو هوایي بریدونو په غبرګون کې ترسره شوي دي.
خلیلزاد ویلي، پر پاکستاني ځواکونو د طالبانو دا پراخ ځمکني بریدونه ظاهراً د غچ اخیستنې او د پاکستان د نورو احتمالي بریدونو د مخنیوي په موخه شوي دي.