تاند (یکشنبه د تلې ـ میزان ۲۰مه) د افغان سولې په برخه کې د امریکا پخواني ځانګړي استازي زلمي خلیلزاد د پاکستاني پوځیانو پر وړاندې د طالبانو وروستي بریدونه غچ اخېستونکي یاد کړي.
هغه په خپله ایکس پآڼه لیکلي چې دا بریدونه پر کابل او پکتیکا د پاکستان د وروستیو هوایي بریدونو په غبرګون کې ترسره شوي دي.
خلیلزاد ویلي، پر پاکستاني ځواکونو د طالبانو دا پراخ ځمکني بریدونه ظاهراً د غچ اخیستنې او د پاکستان د نورو احتمالي بریدونو د مخنیوي په موخه شوي دي.
زلمی خلیلزاد دا څرګندونې داسې مهال کوي، چې طالبانو او پاکستاني پوځیانو د تېرې شپې تر دولس بجو د ډېورنډ کرښې په اوږدو کې دوامداره جګړه کړې او طالبان وايي، چې یو شمېر پاکستاني پوځیانی یې وژلي دي.
د پاکستان پوځ بیا دغه نښتې د هغو عملیاتو برخه بللې چې د ډېورنډ کرښې په اوږدو کې د ترهګریزو ډلو پر وړاندې ترسره شوي دي.
په ورته مهال د سعودي عربستان او قطر د بهرنیو چارو وزارتونو د طالبانو او پاکستان ترمنځ وروستیو وسله والو نښتو ته په اشارې له دواړو لورو د زغم غوښتنه کړې.
د دغو وزارتونو له لوري په خپرو شویو خبرپاڼو کې د طالبانو او پاکستاني پوځیانو ترمنځ ډېورنډ کرښې ته څېرمه پر شوو نښتو اندېښنه څرګنده شوې او ویلي چې وضعیت له نږدې څاري.
په خبرپاڼو کې له دواړو لورو غوښتنه شوې چې د شخړې له پراخېدو ډډه وکړي او د تاوتریخوالي د کمولو او د سیمې د امنیت او ثبات د ساتنې لپاره د خبرو اترو او ډېپلوماسۍ لار غوره کړي.
د سعودي عربستان د بهرنیو چارو وزارت د سولې او ثبات د پیاوړتیا لپاره له سیمه ییزو او نړیوالو هڅو بشپړ ملاتړ اعلان کړی او ټینګار یې کړی چې ریاض لپاره تر هر څه د پاکستان او افغانستان د خلکو امنیت او ارامتیا مهمه ده.
سعودي عربستان او قطر له هغو لومړنیو هېوادونو څخه دي چې تر اوسه یې د طالبانو او پاکستاني پوځیانو ترمنځ د نښتو په اړه غبرګون ښودلی او د تاوتریخوالي پر ځای یې پر ډېپلوماټیک حل ټینګار کړی دی.