تاند(یکشنبه. د تلې/میزان ۶مه) د افغانستان لپاره د پاکستان ځانګړی استازی، صادق خان، د یکشنبې په ورځ تهران ته ورسېد چې له ایراني چارواکو سره د افغانستان په اړه خبرې وکړي.
د پاکستاني رسنیو د راپور له مخې، تمه ده چې په دغو خبرو کې د افغانستان اړوند مسایل او د سیمې د پراخې همکارۍ موضوعات وڅېړل شي.
له بلې خوا ایراني رسنۍ وايي، صادق خان به، چې د افغانستان په چارو کې د پاکستان د صدراعظم استازیتوب کوي، له جګپوړو ایراني چارواکو سره د وروستیو سیمهییزو تحولاتو او دوه اړخیزو اړیکو د ارزونې لپاره وګوري.
دا سفر وروسته له هغه ترسره کېږي چې د پاکستان، ایران، چین او روسیې د بهرنیو چارو وزیرانو په یوه ګډه اعلامیه کې د افغانستان په خاوره کې د امریکا له هر ډول نوې پوځي حضور یا د اډې له جوړېدو سره مخالفت وکړ.
تهران ته د صادق خان سفر په داسي حال کې اعلان شو، چې د پاکستان صدراعظم او لوی درستیز په سپینه ماڼۍ کې د امریکا له ولسمشر ډونالډ ټرمپ سره ولیدل. د راپورونو له مخې، د دوی د خبرو اصلي موضوع افغانستان او د بګرام اډه وه.