تاند (یکشنبه د وږي ـ سنبلې ۳۰مه) د طالبانو د حکومت د ویاند مرستیال، حمد الله فطرت په یوه اعلامیه کې د بګرام اډې په اړه د امریکا ولسمشر ډانلډ ټرمپ څرګندونو ته په غبرګون کې ویلي، د تېرو ناکامو تجربو پر ځای دې پر عقلانیت ولاړې تګلارې غوره شي.
په اعلامیه کې راغلي چې طالبان د شرعي اصولو او اقتصاد محوره او متوازن بهرني سیاست په رڼا کې او د دوه اړخیزو ګټو پر بنسټ له ټولو هېوادونو سره د مثبتو اړیکو غوښتونکی دی.
اعلامیه کاږي چې امریکا دوحې هوکړه کې ژمنه کړې چې د افغانستان د ځمکنۍ بشپړتیا او سیاسي خپلواکۍ لپاره به له زور کار نه اخلي او د افغانستان په کورنیو چارو کې به لاسوهنه نه کوي.
اعلامیه کې له واشنګټن غوښتل شوي چې دغې هوکړې ته ژمن پاتې شي.
دا غبرګون داسې مهال ښودل کېږي چې، د امریکا ولسمشر ټرمپ په یوه خبرداري کې طالبانو ته د ګواښ په شکل ویلي که بګرام ور ونه سپاري نو بدې پېښې به رامنځته شي.