تاند (سېشنبه، د وږي/ سنبلې ۲۵ مه) د امریکا د خزانې وزیر وايي چې واشنګټن او پېکینګ د یوه «چوکاټ» پر سر هوکړې ته رسېدلي دي چې د ټیکټاک د عملیاتي برخې مالکیت او د معلوماتو کنټرول به د امریکا د خاوري دننه ترسره کېږي.
د امریکا د خزانې وزیر سکات بسنت، د دوشنبې په ورځ (د سپتمبر ۱۵ / د وږي ۲۴) وویل چې دغه چوکاټ د هسپانیا په مادرید کې د سوداګریزو خبرو پر مهال ټاکل شوی، څو د دې ټولنیزې شبکې لپاره د امریکایي مالکیت لاره هواره کړي.
هغه زیاته کړه چې د امریکا ولسمشر ډونالډ ټرمپ او د چین ولسمشر شي جینپینګ به د جمعې په ورځ دغه توافق «وروستی» کړي.
ښاغلي ټرمپ نن د ټروتسوشل په شبکه کې لیکلي چې خبرې «ډېرې ښې پر مخ تللې» دي.
په داسې حال کې چې چین هم تایید کړې چې د دواړو لوریو تر منځ پر یوه چوکاټ هوکړه شوې، خو ټینګار یې کړی چې هېڅ توافق به د چینایي شرکتونو د ګټو په قیمت ترسره نه شي.
د دې چوکاټ د جوړېدو خبر په داسې مهال ورکول کېږي چې د ټیکټاک د چینایي مالک لپاره د امریکا ضربالاجل نژدې شوی دی، چې پر اساس یې که د دې شرکت لپاره د امریکا دننه پېرودونکی پیدا نه کړي، د دې شبکې فعالیت به په امریکا کې وتړل شي او د ډاونلوډ او تازهکولو مخه به یې ونیول شي.
د امریکا د خزانې وزیر سکات بسنت، دغه «چوکاټ» د هغو خبرو په دوهمه ورځ اعلان کړ چې موخه یې د نړۍ د دوو سترو اقتصادي قدرتونو ترمنځ د سوداګریزو جګړو پای ته رسول دي.