تاند (شنبه، د وږي/ سنبلې ۱۵ مه) د ازبکستان ولسمشر د افغانستان خلکو ته په استولې پیغام کې اعلان کړی چې تاشکند له کابل سره د ستراتیژیکو همکاریو د ټینګښت په لټه کې دی.
«شوکت میرضیایف» د ازبکستان ولسمشر د شنبې په ورځ د افغانستان خلکو ته په استولې پیغام کې ټینګار کړی چې هېواد یې له کابل سره د ستراتیژیکو همکاریو پراختیا ته چمتو دی.
یاد پیغام په کابل کې د «د پانګونې د جذب او د برېښنا د انرژۍ د سکتور د ملاتړ» په نړیوال کنفرانس کې د ازبکستان د انرژۍ وزیر «جوره بیک میرزامحمدوف» وړاندې کړ.
«د طالبانو د حکومت د بهرنیو چارو وزارت د اقتصادي اړیکو رییس شفیع اعظم د ازبک وزیر له قوله وویل: «زه خوښ یم چې په داسې ناستې کې برخه اخلم چې پکې د افغانستان د انرژۍ تولید او اقتصادي پراختیا لومړنی زړی اېښودل کېږي.»
دا لومړی ځل دی چې د ازبکستان د انرژۍ وزیر په افغانستان کې د برېښنا د سکتور په اړه ناستې کې ګډون کوي.
یاد دوهورځنی کنفرانس د افغانستان د برېښنا شرکت په کوربهتوب په کابل کې جوړ شوی، چې پکې د بهرنیو هېوادونو استازي، نړیوال بنسټونه، خصوصي سکتور او کورني او بهرني پانګوال ګډون لري.
د ازبکستان ولسمشر څو ورځې وړاندې هم ویلي و چې د افغانستان پراختیا د ګاونډیانو له رغنده همکاریو پرته ناشونې ده، او «موږ هېڅکله له خپل ګاونډي جلا نه یوو او نه شا وراړولی شو.»
په وروستیو کلونو کې ازبکستان، افغانستان د برېښنا له اصلي صادروونکو څخه دی. د طالبانو له بیا واک ته رسیدو وروسته، تاشکند هڅه کړې چې له کابل سره خپلې اقتصادي اړیکې وساتي او لا پیاوړې کړي.
د ټاپي او کاسا-۱۰۰۰ په شان سیمه ییزو پروژو ته په پام، افغانستان د ازبکستان لپاره د ترانزیټي دهلېز او د انرژۍ په برخه کې د ستراتیژیک شریک په توګه ځانګړی اهمیت لري.