د پاکستان حکومت ۴۵۰۰ افغان محصلانو ته د طب، انجینرۍ، کرنې، مدیریت، کمپیوټر ساینس او نورو برخو کې د زده کړو لپاره بورسونه اعلان کړل.

پاکستاني رسنیو نن د خپل هیواد د چارواکو په قول ولیکل، دا نوښت د پاکستان او افغانستان د اړیکو د پیاوړتیا، د خلکو تر منځ د اړیکو د زیاتوالي او د افغانستان د بیا رغونې لپاره د بشري سرچینو د پراختیا په موخه ترسره کېږي.

بورسونه په پاکستاني پوهنتونونو کې د تحصیلي فیس بشپړ لګښت، د ژوند مصرف، د کتابونو لګښت او د لیلیې فیسونه پوښي. دا سکالرشیپونه د لیسانس، ماسټرۍ (MS/MPhil) او دوکتورا (PhD) لپاره دي.

د بورس شرایط

لیسانس (Undergraduate):

• لږ تر لږه ۱۲ کاله زده کړه یې کړې وي.
• د عمر حد د ۱۷ او ۲۳ کلونو ترمنځ وي.
• د عمومي مضامینو لپاره لږ تر لږه ۶۰٪ نومرې او د طب او انجینرۍ د مضامینو لپاره لږ تر لږه ۶۵٪ نومرې (د IBCC پاکستان د معادل فارمولا پر اساس).

ماسټري (MS/M.Phil):

• د غوښتنلیک پر مهال عمر باید له ۳۵ کلونو زیات نه وي.
• لږ تر لږه ۱۶ کاله زده کړې بشپړې شوې وي.
• د بکلوریا یا ماسټرۍ په پای کې لږ تر لږه ۲.۵ CGPA له ۴.۰ څخه.

دوکتورا (PhD):

• د غیر استادانو لپاره د عمر حد ۳۵ کاله او د استادانو لپاره ۴۰ کاله دی.
• لږ تر لږه ۱۸ کاله زده کړې بشپړې شوې وي.
• په ماسټرۍ (MS/M.Phil) کې لږ تر لږه ۳.۰ CGPA له ۴.۰ څخه.

د غوښتنلیک لېږل

• غوښتنلیکونه باید یوازې آنلاین د دې وېبپاڼې له لارې وسپارل شي: http://pakafghan.hec.gov.pk
• د غوښتنلیک د پروسې لپاره د کارن لارښود (User Manual) په وېبپاڼه کې شته.
• کاغذي (Hard Copy) غوښتنلیکونو نه منل کېږي.

وروستۍ نېټه

• د آنلاین غوښتنلیکونو د سپارلو وروستۍ نېټه د ۲۰۲۵ کال د سپتمبر ۳۰مه ده.

افغان محصلان چې قوي تحصیلي ریکارډ لري، هڅول کېږي چې له دې مهمې موقع څخه ګټه واخلي او په پاکستان کې لوړې زده کړې ترسره کړي.