تاند『پنجشنبه د زمري ـ اسد ۹مه』د تورغونډۍ بندر د پراختیا او پانګونې هوکړه لاسلیک شوه.
دا هوکړه چې د افغانستان او ترکمنستان تر منځ لاسلیک شوه، له مخې به یې د دواړو هېوادونو ترمنځ د ریلي ټرانسپورټ شبکې د همغږۍ، دوه اړخیزو همکاریو پر پراختیا، د انتقالاتو پر زیاتوالي او سوداګرو ته د اسانتیاوو د برابرولو لپاره به د تورغونډۍ بندر پر پراختیا پانګونه وشي.
دغه هوکړه ۵ میلیونه ډالر ارزښت لري.
د معلوماتو له مخې دغه هوکړه د طالبانو د ټولګټو چارو وزارت اوسپنې پټلۍ معینیت او ترکمنستان دیمیریول ګورلوشیک سهامي شرکت ترمنځ لاسلیک شوه.
د تړون له مخې به یاد شرکت د تورغونډۍ – هرات اوسپنې پټلۍ مسیر کې د تخلیې او بارګیرۍ لپاره نوي ګودامونه او تاسیسات ډیزاین او فعال کړي.
اقتصاد پوهان وایي، د تورغونډۍ بندر اقتصادي ارزښت ډېر ستر دی، ځکه د دوی په باور دا بندر د افغانستان او ایران ترمنځ مهم سوداګریز تمځای ګڼل کېږي.
دغه بندر د افغانستان لپاره د سمندر له لارې نړیوالو بازارونو ته د لاسرسي یوه نږدې او ارزانه لاره برابروي، چې له امله یې د وارداتو او صادراتو لګښتونه راکمېږي.
د تورغونډۍ بندر له لارې ډېر شمېر سوداګریز توکي، لکه نفت، خوراکي مواد، ساختماني سامانونه او نور توکي هېواد ته راځي یا بهر ته صادرېږي.
همداراز، دغه بندر د سیمهییزو هېوادونو ترمنځ اقتصادي همکارۍ ته وده ورکوي او د سوداګرۍ، ترانسپورت، او کارموندنې لپاره نوي فرصتونه رامنځته کوي، چې دا ټول د افغانستان د اقتصاد پر پیاوړتیا مثبت اغېز لري.