تاند『دوشنبه د چنګاښ ـ سرطان ۲۳مه』د ننګرهار ځایي طالب مسوولان وایي، د دې ولایت په درهنور او شینوارو ولسوالیو کې د یکشنبې ورځې ورښتونو په پایله کې د راوتلو سېلابونو له امله خلکو ته درانه مالي زیانونه اوښتي دي.
د ننګرهار د طبیعي پېښو پر وړاندې د مبارزې ادارې ویلي چې د دره نور ولسوالۍ برکوټ، شیمل، کشموند قلعه، سفر قلعه او وایګل سیمو کې زراعتي فصلونه د ږلۍ له امله سخت زیانمن شوي او د شکیالي په کلي کې لسګونه سولرې او نور اسباب تخریب شوي دي.
د مسوولانو په وینا د شینوارو ولسوالۍ اړوند ۲۶مه ویالې (اخر فارم) سیمه کې د تېز باران له امله یو دیوال راپریوتی، چې له امله یې دوه ماشومان ټپیان شوي دي.
دغه راز د لغمان ولایت په الینګار ولسوالۍ کې د سېلابونو له امله شپږ کسان ژوبل شوي دي.
لغمان کې طالب مسوولان وایي د دغو سېلابونونو له امله په بېلابېلو سیمو کې کرنيزې ځمکې هم زیان لیدلی دی.
دا په داسې حال کې ده چې، نن (دوشنبه) هم د هېواد په ۱۹ ولایتونو کې د بارانونو اټکل شوی دی.