تاند (پنجشنبه، د غويي/ ثور ۲۵ مه) طالب چارواکي وايي چې د خوست ولایت د شمل دوهمنده ولسوالۍ په یوه سیمه کې یې د کوارتز یو لوی کان کشف کړی دی.
د طالبانو تر واک لاندې د خوست ولایت د کانونو او پټرولیم ریاست اعلان وکړ چې په شمل دوه منده ولسوالۍ کې د موندل شوي کان زیاتره رګونه په شیلو او رسوبي ډبرو کې خپرې شوې دي.
که څه هم تر اوسه د دغه کان دقیق اقتصادي ارزښت نه دی معلوم شوی، خو طالبانو اټکل کړی چې د دې کان کشف ډېر ارزښتناک دی.
افغانستان د نړۍ یو له هغو هیوادونو څخه دی چې ډېر کانونه لري خو ورڅخه سمه استفاده نه شي کولی.
کوارتز هغه معدني توکی دی چې زیاتره د تېلو په صنعت، د کمپیوټر او تلویزیون په سکرینونو، لاسي ساعتونو، کمرو او د تلسکوپونو د لینزونو، او همداراز د هوایي رادارونو په جوړولو کې کارېږي.
کوارتز یوه کلکه او کریسټالي تیږه ده چې له دوو مادو؛ سیلیس او اکسیجن څخه جوړه ده. د دې تیږې د کلکوالي درجه ۷ ده او له همدې کبله د نړۍ یوه کلکه تیږه ګڼل کېږي. ځینې شفافې او ځینې نیمه شفافې وي.
دا تیږه په برازیل، متحدوایالتونو، مدګاسکر (مدغاسکر) او د اروپا په الپ غرونو کې موندل کېږي.