تاند【پنجشنبه د ثور غویي ۲۵مه】د شطرنج نړیوال فدراسیون په یوه خبرپاڼه کې د طالبانو له لوري د شطرنج لوبو ځنډول خواشینوونکی عمل بولي.
سرچینې ویلي چې، دا بندیز به د شطرنج په شوي پرمختګ ناوړه اغېز وکړي.
یاد فدراسیون زیاتوي، چې دا پرېکړه به د افغان ځوانانو هغه فرصتونه له منځه یوسي چې کولای شي په نړیوالو سیالیو کې یې ولري.
افغانستان د شطرنج ملي لوبډله هم لري.
دا غبرګون داسې مهال خپرېږي، چې تېره اوونۍ د طالبانو د حکومت المپیک کمېټې وویل، چې د تخنیکي او شرعي دلایلو له مخې د شطرنج لوبې تر امر ثاني ځنډوي.
په ورته وخت کې د شطرنج نړیوال فدراسیون خبرداری ورکړی، چې د المپیک نړیوالې کمېټې، د آسیا شطرنج فدراسیون او نورو نړیوالو ادارو سره به اړیکه وکړي، څو دا لوبه بېرته را وګرځوي.
د یادونې ده چې د طالبانو له دې وړاندې د آزادې مبارزې پر لوبو هم بشپړ بندیز لګول شوی او پر یو شمېر نورو یې محدودیتونه وضع کړي دي.