تاند (پنجشنبه، د غويي/ ثور ۲۵ مه) د هند او پاکستان ترمنځ د ترینګلتیا په اوج کې یوې سرچینې هندي رسنیو ته ویلي چې د طالبانو د حکومت یو جګپوړی چارواکی په پټه هند ته سفر کړی دی.
د «سنډې ګارډین» ورځپاڼې د راپور له مخې، د طالبانو د حکومت د کورنیو چارو وزارت امنیتي مرستیال «محمد ابراهیم صدر» د مې میاشتې په لومړیو کې په «پټه» توګه هند ته تللی دی.
د دې رسنۍ پر اساس، دا سفر نه د هند دولت او نه هم د طالبانو حکومت په رسمي توګه تأیید یا رد کړی دی.
ابراهیم صدر د طالبانو له مشر هبتالله اخندزاده سره نژدې کس بلل کېږي او ویل کېږي چې د پاکستان د پالیسیو سخت مخالف دی. نوموړی د طالبانو د امنیتي جوړښت مهمې برخې تر خپل کنترول لاندې لري.
د هندي رسنیو د راپور له مخې، د طالبانو د دغه چارواکي سفر یوازې څو ورځې وروسته له هغه شوی چې د هندي کشمیر په «پهلګام» کې پر سیلانیانو خونړۍ حمله وشوه، او هممهاله د اسلامآباد او نوي ډیلي ترمنځ ترینګلتیا زیاته شوې ده. دا هممهالوالی د سیمې شنونکي دې ته اړ کړي چې د هند له خوا د طالبانو په اړه د دریځ د بدلون احتمال مطرح کړي.
ځینې باخبره سرچینې احتمال ورکوي چې دا سفر ممکن د امنیتي خبرو او استخباراتي همکاریو د ارزونې لپاره شوی وي. د طالبانو او پاکستان ترمنځ ترینګلو اړیکو په پام – په ځانګړي ډول له هغه وروسته چې پاکستان سلګونه زره افغان کډوال وایستل او پر اسلامآباد د افراطي ډلو د ملاتړ تورونه ولګېدل—هند ښايي هڅه وکړي چې له کابل سره د تعامل غیر رسمي لارې پرانیزي.
سره له دې، تر اوسه د دې لیدنې هېڅ تصویر، اعلامیه یا سند نه دی خپور شوی، او دواړه خواوې په دې اړه غلي دي. شنونکي ټینګار کوي چې هند په سیمهییزو حساسو مسایلو، په ځانګړي ډول د افغانستان او پاکستان په اړه، تل یو محتاط سیاست غوره کړی دی.
خو له دې ټولو سره څه چې بیخي روښانه دي، دا دي چې طالبانو د تېرې دورې خلاف، چې له هند سره یې د مخالفت پالیسي غوره کړې وه، دا ځل یې له هند سره خپلې اړیکې د پاکستان د ګټو قرباني کړي نه دي.