د کردانو وسلواله ډله PKK (د کردستان کارګر ګوند) چې مشر يې عبدالله اوجالان او له ۱۹۹۹م کال راهيسې بندي دی، اعلان وکړ چې خپل فعاليتونه به پای ته رسوي، وسله به کېږدي او له ترکيې سره څلوېښت کلنه شخړه پای ته رسوي.
دا تاريخي پرېکړه، د فیرات خبري آژانس لخوا خپره شوې چې د PKK ډلې سره نږدې اړیکي لري.
دا پرېکړه په داسې مهال کېږي چې د دغه خونړي شخړې له امله لسګونه زره کسان وژل شوي دي.
د روان ۲۰۲۵ کال په فبرورۍ مياشت کې، عبدالله اوجالان چې د استانبول ته نږدې يوه ټاپو کې بندي دی، له خپلې ډلې وغوښتل چې غونډه وکړي او د رسمي ډول ړنګېدو پرېکړه وکړي.
PKK د مارچ پر ۱ نېټه د يو اړخيز اوربند اعلان کړی و، خو دا يې مشروط کړی و، او د شرطونو له ډلې څخه يو هم د سولې د خبرو لپاره نوی حقوقي چوکاټ جوړېدل و.
دا پرېکړه کولای شي د ترکيې او کردانو ترمنځ د سولې يو نوی باب پرانېزي.