تاند【پنجشنبه د ثورـ غویي ۱۱مه】د تاجکستان د اوسني رژیم مخالف ګوند «د تاجکستان د اصلاح او پراختیا غورځنګ» مشر شرفالدین ګادویف وايي، د امام علي رحمان تر مشرۍ لاندې د تاجکستان اوسنی رژیم په کور دننه د ټولو ناخوالو او هم د افغانستان په ګډون له نورو ګاونډیو هېوادونو سره د ناسمو او ترینګلو اړیکو مسئول دی.
ګاودیف چې کابل ته د یوه خصوصي بنسټ په رسمي بلنه سفر کړی زیاتوي، چې د تاجکستان د اوسني رژیم او رهبرۍ د ناسمې او ظالمانه رژیم د پالیسۍ له کبله دغه هېواد او تاجکستاني اتباع له جدي ګواښ سره مخ دي.
هغه وایي بېکاري، قانون ماتونې، د فرصتونو نشتوالي او سیاسي ځورونې زرګونه تاجکستاني ځوانان دې ته اړ کړي، چې د داعش غېږې ته لاړ شي.
ګادویف وایي، د ولسمشر امامعلي رحمان د رژیم استبدادي سیاستونه؛ چې پکې د سیاسي اپوزیسیون له منځه وړل، د مخالفینو فزیکي له منځه وړل، عام وژنې، ظالمانه نیونې او وېرې اچول شامل دي، د افراطي نظریاتو د خپراوي لپاره مناسبه فضا رامنځته کړې ده.
ګاودیف دغه راز افغانستان خپل مهم او د باور وړ ګاونډی بللی او ویلي یې دي چې په دغه هېواد کې له افغان کډوالو سره اوسنی ناوړه چلند او دغه راز له افغان دولت سره د تاجکستان د اوسني رژیم ناسم تعامل، د تاجکستان د خلکو نه، یواځې د امام علي رحمان او د ده رژیم شخصي پالیسي ده.
د تاجکستان د اوسني رژیم مخالف ګوند «د تاجکستان د اصلاح او پراختیا غورځنګ» مشر شرفالدین ګادویف ټینګار کړی، چې ملت یې له افغانستان او افغانانو سره د ښو اړیکو غوښتونکی دی او دوی هڅه کوي چې په دې برخه کې د تاجکستان د اوسني رژیم پالیسي وننګوي.