تاند【پنجشنبه د ثور ـ غویي ۱۱مه】د جمهوري نظام د پارلمان استازې مریم سلېمانخېل وايي، پاکستان د بشري حقونو هدیره ده او د بشري حقونو فعالانو سره په کې د ترهګرو په څېر چلند کېږي.
نوموړې وايي پاکستان د بشري حقونو فعالان ځوروي، خو اصلي ترهګر په کې آزاد ګرځي.
اغلې سلېمانخېل دا خبرې داسې مهال کوي، چې د راپورونو اه مخې علي وزیر د سندهـ په یوه زندان کې په نازک روغتیايي وضعیت کې بندي دی او لومړنۍ روغتیایي آسانتیاوې ورته نه ورکول کېږي.
د معلوماتو له مخې علي وزیر په ۲۰۲۰ز کال کې د پاکستان د حکومت له لوري په څو جوړو شویو قضیو کې نیول شوی و.
په ۲۰۲۳ز کال کې د محکمې له لوري له ضمانت وروسته علي وزیر سملاسي بېرته په نورو قضیو کې نیول شوی او لا هم په زندان کې دی.
مریم سلېمانخېل وايي د پاکستان دولت د پوځ په لاس کې دی او د ماهرنګ بلوچ په شمول نورې ښځینه فعالان یې هم نیولې او ځورولې دي.
د بلوڅو د حقونو فعاله ماهرنګ بلوڅ د روان کال د مارچ په ۲۲مه نېټه د یوه لاریون پر مهال نیول شوې او لا هم په زندان کې په نامعلوم برخلیک شپې ورځې سبا کوي.