تاند (جمعه، د کب/ حوت ۲۴ مه) د طالبانو د کورنیو چارو وزارت د تریاکو د بیې د لوړېدو په اړه د ملګرو ملتونو د تازه راپور په غبرګون کې ویلي چې د تریاکو د بیې لوړوالی د افغانستان د نشهيي موادو د تولید د کمښت له امله دی او دا د طالبانو لپاره یوه بریا ګڼل کېږي.
ملګرو ملتونو د چهارشنبې په ورځ (د کب ۲۲ مه) راپور ورکړ چې د تریاکو بیه لس برابره لوړه شوې او لوی قاچاقبران له دې وضعیت څخه ګټه اخلي.
د ملګرو ملتونو له نشهيي موادو او جرمونو سره د مبارزې دفتر ویلي چې د ۲۰۲۴ کال لپاره د هر کیلو تریاکو بیه ۷۵۰ ډالرو ته رسېدلې، چې د ۲۰۲۲ کال په پرتله لس برابره زیاتوالی ښيي. دغه دفتر همداراز ویلي چې د نشهيي موادو د تولید کمښت، لوی قاچاقبران شتمن کړي دي.
د طالبانو د کورنیو چارو وزارت په غبرګون کې ویلي چې د ملګرو ملتونو د نشهيي موادو ضد دفتر څرګندونې، د نشهيي موادو پر ضد د طالبانو د «جدیت» ثبوت دی.
د کورنیو چارو وزارت ویاند، عبدالمتین قانع، ویلي: «دا هر چا ته واضح ده چې کله تولید او عرضه نه وي، بیې څو چنده لوړېږي.»
هغه زیاته کړه: «په هېواد کې د نشهيي موادو د پروسس او قاچاق کچه په بېساري ډول کمه شوې، او د نشهيي موادو پر ضد د مبارزې پولیسو خپل فعالیتونه پراخ کړي، او دا لړۍ به لا نوره هم پیاوړې شي.»
وروسته له هغه چې د طالبانو مشر د کوکنارو کښت منع کړی، په افغانستان کې د دې بوټي کښت په بې ساري ډول کم شوی دی.
د م.م. له مخدرو موادو او جرمونو سره د مبارزې اداره: د افغانستان د تریاکو بیه اوج ته رسېدلې – تاند