تاند【چهارشنبه د کب ـ حوت ۱۵مه】د جرمني بهرنیو چارو وزیرې، انالېنا باربوک پرون سه شنبه د کب په ۱۴مه په یوه غونډه کې ټینګار کړی چې د افغانانو ملاتړ ته به دوام ورکوي.
هغې زیاته کړې چې افغانستان ته بشري مرستې، خوراکي توکي او روغتیايي مرستې رسوي او پرته له دې چې د سرپرست حکومت لاسرسی ورته وي، د نړۍوالو بنسټونو له لارې رسيږي.
باربوک د افغان ښځو او نجونو پر ملاتړ هم تر ټولو زیات ټینګار کړی دی.
جرمني داسې مهال د افغان ښځو پر ملاتړ ټینګاړ کوي چې په افغانستان کې د طالبانو له حاکمیت وروسته ښځې له هر ډول حقه بې برخې شوي دي.
بل لورته بیا د ملګرو ملتونو د استوګنې پروګرام (یو اېن-هبیتات) هم د افغان ښځو او نجونو د حقونو، ونډې او پیاوړتیا په اړه پر خپلې ژمنتیا یو ځل بیا ټينګار کړې دی.
په افغانستان کې د دغې ادارې استازې، سټېفني لوز، د ښځو د نړۍوالې ورځې د رارسېدو په درشل کې وايي، زدهکړو، روغتیا او پاکو اوبو ته لاسرسی د افغانستان د ښځو او نجونو له ژوند سره ژور تړاو لري.