تاند【یکشنبه د سلواغې ـ دلوې ۲۸مه】افغان ورو توپ اچونکی مجیب الرحمن د هند غوره لیګ یا (آی پي اېل) کې د روان کال په سیالیو کې واخیستل شو.
نوموړی د بل افغان توپ اچونکي، الله محمد غضنفر پر ځای له ممبيي انډینز لوبډلې سره د لوبېدو تړون لاسلیک کړ.
الله محمد غضنفر د ټپ له امله د اتلانو جام په سیالیو کې هم د افغان لوبډلې له نوملړه بهر شوی دی.
سره له دې چې مجیب ځدراڼ هم د اتلانو جام سیالیو کې له لوبېدو د ټپ له امله منع شوی دی.
کرکټ بورډ ویلي وو چې مجیب د اوږده فارمټ لوبو منع شوی او نوموړی کولی شي په لنډ فارمټ لوبو کې ولوبېږي.
دا خبر داسې مهال خپرېږي چې نن افغان ملي لوبډله د اتلامو جام سیالیو چمتووالي لپاره خپله دوهمه تمریناتي لوبه له نیوزلنډ سره ترسره کوي.