تاند【سه شنبه د سلواغې ـ دلوې ۹】د افغانستان کرکټ بورډ مشرتابه، یو شمېر لوبغاړو او کارمندانو پرون (دوشنبه د سلواغې اتمه) د علي رضا آساهي کورنۍ ته خپله خواخوږي او خواشیني وړاندې کړه.
د افغانستان کرکټ بورډ مشرتابه د دې ادارې پر استازیتوب د آساهي له کورنۍ سره د خواخوږۍ څرګندولو ترڅنګ نغدي مرسته هم وکړه.
میرویس اشرف د اساهي د کورنۍ له مشرانو وغوښتل، چې د آساهي ماشومانو ته باید د هوسا ژوندانه او زدهکړې زمینه هم برابره شي.
د ملي لوبډلې لوبغاړو هم د آساهي کورنۍ ته خپلې نغدي مرستې اعلان کړې، چې ډېر ژر به د آساهي کورنۍ ته وسپارل شي.
علي رضا آساهي څو ورځې مخکې د زړه د ناروغۍ له کبله خپل ژوند له لاسه ورکړ او د کارته سخي په اړوند هدیره کې خاورو ته وسپارل شو.