تاند (دوشنبه، د سلواغې/ دبلوې ۸ مه) د طالبانو حکومت ند یکشنبې په ورځ/ سلواغه ۷/ جنوري ۲۶) اعلان وکړ چې په هرات ولایت کې د ټاپي پروژې نللیکه ۳ کیلومتره نوره غځول شوې او تر دې دمه په افغانستان کې د ټاپي پروژې د ګازو نللیکې شپږ کیلومتره بشپړه شوې ده.
د ټاپي پروژې عمومي رئیس د طالبانو د هرات له والي سره په کتنه کې د دې پروژې د نللیکې د جوړولو د بهیر د چټکولو خبر ورکړی دی.
د طالبانو ویاند ذبیحالله مجاهد مخکې ویلي و چې د ټاپي پروژې عملي کار په افغانستان کې روان دی.
مجاهد څه باندې یوه اوونۍ مخکې په افغانستان کې د ټاپي نللیکې د درې کیلومتره غځېدو خبر ورکړی و او نن یې د درې کیلومتره نور پایپ لاین د اېښودو خبر ورکړ. د دې معنا دا ده چې په افغانستان کې د ټاپي کار په چټکه روان دی.
د دې پروژې د جوړولو په اړه له شاوخوا درې لسیزو خبرې کېږي خو دا لومړی ځل دی چې پر دې پروژې په عملي ډول د افغانستان په خاوره کې کار پیل شوی دی.
ترکمنستان په خپله خاوره کې د ټاپي نللیکه د افغانستان تر پولې رارسولې ده.
طالبانو نژدې پنځه میاشتې مخکې په افغانستان کې د دې پروژې د بیا پیل اعلان وکړ. په دې موده کې د پایپ لاین په لاره کې مځکه هواره او چمتو شوه.
د ټاپي پروژې کار اته کاله مخکې د افغانستان، ترکمنستان، پاکستان او هند د هغه وخت د مشرانو په ګډون په هرات کې پیل شوی و، خو د هېوادونو ترمنځ د اختلافاتو او په افغانستان کې د ناامنۍ له امله یې چندان پرمختګ ونه کړ.
د ټاپي د ګازو نللیکه د یوې سیمهییزې پروژې په توګه ګاز له ترکمنستان څخه د افغانستان له لارې پاکستان او هند ته لېږدوي. دا پروژه ۱۸۲۱ کیلومتره اوږدوالی لري او د کال ۳۳ میلیارد متر مکعب ګاز لېږدولی شي.