تاند(چهارشنبه، د لیندۍ/ قوس ۲۱ مه) د روسیې د صدراعظم مرستیال، دینیس مانتوروف، وايي چې روسیه او ازبکستان د افغان-ترانس ریللارې د جوړولو لپاره د امکان سنجونې په برخه کې ګډ کار کوي. دینیس مانتوروف وویل: «موږ د نړیوالو ترانسپورتي دهلیزونو پراختیا ته ځانګړې پاملرنه کوو.»
د روسیې دولتي خبري آژانس تاس د سې شنبې په ورځ، د لیندۍ ۲۰، راپور ورکړ چې دینیس مانتوروف د روسیې او ازبکستان د حکومتونو ترمنځ د همکارۍ د کمیسیون په پنځه ویشتمه ناسته کې وویل چې د افغان-ترانس ریل پټلۍ د جوړولو د تخنیکي او اقتصادي پلان د تیارولو لپاره ګډ کار روان دی.
د روسیې د صدراعظم مرستیال، الیکسي اورچوک، د ۱۴۰۳ کال د لیندۍ په میاشت کې کابل ته په سفر کې د طالبانو چارواکو ته وویل چې مسکو غواړي د افغان-ترانس ریللارې پروژه کې ګډون وکړي. هغه زیاته کړه چې دا پروژه به په سیمه کې د منځنۍ آسیا او اوراسیا د اتصال په ښه کولو کې کلیدي رول ولوبوي.
ښاغلي اورچوک په همدې وخت کې خبر ورکړ چې دا پروژه د روسیې د ترانسپورت وزارت او د منځنۍ آسیا د هېوادونو ترمنځ تر ارزونې لاندې ده.
روسیه هیله لري چې د دې پروژې په بشپړېدو سره افغانستان د اوراسیا هېوادونو او جنوبي سیمو ترمنځ په ترانسپورتي اړیکو کې مهم رول ولوبوي.
د افغان-ترانس ریللار د جوړولو طرحه د ۲۰۱۸ کال په ترڅ کې د افغانستان، پاکستان او ازبکستان ترمنځ وړاندې شوه، چې د منځنۍ آسیا هېوادونه د پاکستان له بندرونو سره ونښلوي. د دې پروژې لګښت تر څلور نیم میلیارد ډالرو اټکل شوی او ۵۷۳ کیلومتره اوږدوالی لري.
دا ریل پټلۍ به د ازبکستان له ترمذ ښار څخه پیل شي، د مزارشریف او کابل له ښارونو څخه به تېرېږي، او د پاکستان پېښور ښار ته به ورسېږي.
د ازبکستان ولسمشر، شوکت میرضیایف، د ۱۴۰۲ کال د کب په میاشت کې د روسیې له ولسمشر ولادیمیر پوتین څخه غوښتنه وکړه چې مسکو دې د افغان-ترانس ریل پټلۍ په پروژه کې برخه واخلي.