تاند ( چهارشنبه د لیندۍ/ قوس ۲۱مه) د طالبانو د حکومت ویاند ذبیح الله مجاهد د ایران له لوري افغانستان سره پر پوله دېوال جوړولو ته په غبرګون کې ویلي،چې د طالبانو حکومت د خپلو ګانډیانو پر وړاندې خپل مکلفیتونه ادا کړي دي.
مجاهد زیاته کړې، چې د افغانستان له خاورې ګاونډیو ته هیڅ ډول ګواښ نشته او دې برخه کې د ایران اندېښنې ځواب شوې دي.
نوموړي ویلي،چې د ایران پر وړاندې د افغانستان له خاورې هیڅ ډول ګواښ نشته او د دواړو هېوادونو سرحدي ځواکونه له یو بل سره بشپړه همغږي لري.
دا په داسې حال کې ده، چې تر دې وړاندې ایراني چارواکو ویلي و، چې افغانستان سره سرحد کې د دېوال جوړولو چارې یې ۳۵ کیلومټره بشپړې کړې دي.