د نیوزیلنډ ښځینه کرکټ لوبډلې د شل اوریز نړیوال جام په پایلوبه کې د جنوبي افریقا په ماتولو سره په لومړي ځل نړیوال جام وګاټه.
پایلوبه نن یکشنبه د اکتوبر په ۲۰مه نېټه د عربي متحده اماراتو د دوبۍ په لوبغالي کې ترسره شوه چې نیوزیلنډ د ۳۲ منډو په تفاوت وګټله.
د لوبې پچه جنوبي افریقا وګټله او توپ اچونه یې غوره کړه، د نیوزیلنډ لوبډلې په شلو اورونو کې د ۵ لوبغاړو تر سوځېدو وروسته ۱۵۸ منډې وکړې.
د یادې لوبډلې په ګټه امیلیا کر۴۳، بروکي هالیډی ۳۸ او سوزي بټز ۳۲ منډې وکړې.
سویلي افریقا ته بیا په توپ اچونه کې نانکولولیکو ملابا دوه لوبغاړې وسوځولې.
د نیوزیلنډ د هدف په دوام د سویلي افریقا لوبډلې ۱۲۶ منډې وکړې، ۹ لوبغاړي یې وسوځېدل او یو وار بیا یې پایلوبه وبایلله.
لورا د جنوبي افریقا مخکښه منډه جوړونکې وه چې ۳۳ منډې یې کړې وې او د نیوزیلنډ په توپ اچونکو کې امیلا کر او رسمیري مایر ۳ـ۳ لوبغاړې وسوځولې.
د نیوزیلنډ ملي لوبډله تر دې وړاندې هم درې ځل تر پایلوبې رسېدلې وه، خو په لومړي ځل یې پایلوبه وګټله.
د سویلي افریقا ښځینه لوبډلې بیا تېر ځل هم په پایلوبه کې د اسټرالیا پر وړاندې ماتې خوړلې وه او لا یې هېڅ نړیوال جام نه دی ګټلی.
سږکال په لومړي ځل د ښځینه نړیوال جام امتیازات هم د نارینه وو په څېر و، ګټونکې لوبډلې ته دوه اعشاریه ۳۴ میلیونه او دویم مقام ګټونکې لوبډلې ته ۱ اعشاریه ۱۷ میلیونه امریکايي ډالر ورکړل شول.