تاند (یکشنبه، د میزان ۲۸ مه) د افغانستان د والیبال ملي لوبډلې نن (یکشنبې) مالدیف ته درې پر صفر ماته ورکړه.
د ازبکستان په پلازمېنه تاشکند کې د څو اسیايی هیوادونو د روانو سیالیو په لړ کې افغانستان تېرې دوې سیالۍ د ترکمنستان او ازبکستان پر ټیمونو بایللي دي. خو دا یې لومړۍ مسابقه وه چې ویې ګټله.
د افغانستان د والیبال ملي لوبډله به سبا (دوشنبې) له تاجیکستان او د سې شنبې په ورځ له قرغیزستان سره په وروستۍ مسابقه کې مخامخ شي.
د والیبال د اتلولۍ دا مسابقې د روان میزان په ۲۷ مه د ازبکستان په تاشکند ښار کې پیل شوې او د عقرب تر درېیمې پورې به دوام وکړي.