تاند ( سې شنبه د میزان ۲۴مه) د بښنې نړیوال سازمان یا ایمنسټي انټرنیشنل او د پاکستان د بشري حقونو کمېسیون پر پاکستاني حکومت غږ کړی، چې په کراچۍ کې د روادارۍ کمېټې غړي خوشې او د هغوی پر ضد قضیې دې ختمې کړي.
یادو ادارو د اکتوبر پر ۱۴مه، په جلا جلا خبرپاڼو کې ویلي، چې د اکتوبر پر ۱۳مه، په کراچۍ کې د روادارۍ کمېټې سوله ییزو فعالانو په سیند صوبه کې د سخت دریځۍ پر ضد لاریون کاوه، چې پولیسو ووهل او ګڼ یې ونیول.
د یادې کمیټې فعالان وایي چې پولیسو ورسره هغه وخت تاوتریخوالی وکړ کله، چې دوی د سخت دریځۍ پرضد لاریون پیلوه.
په لاریون کې غوښتنه کېدله، چې د ډاکټر شاهنواز په قتل کې لاس لرونکي کسان دي ونیول شي.
ډاکټر شاهنواز د مذهب سپکاوي په تور وژل شوی وو.
د کراچۍ پولیسو په یوه خبرپاڼه کې ویلي چې په دې ښار کې پر غونډو او مظاهرو بندیز وو نو ځکه یې د روادارۍ کمېټې او د هغوی پر ضد راوتلو تحریک لبیک پاکستان ډلې د غړو پر ضد عمل وکړه.
پولیس وایي ډېری نیول شوي کسان خوشې شوي دي.