تاند (سې شنبه، د سنبلې ۱۳ مه) په بلخ ولایت کې د موټرو د مونتاژ یوې فابریکې د ۶ میلیون افغانیو په لګښت دوه ډوله نوي موټر جوړ کړي دي.
په بلخ ولایت کې د امين نور شرکت مسوول حبيب الله بارکزی وایي، چې په دې فابریکه کې يې دوولس ډوله موټر او بار وړونکي بايسکلونه جوړول او د روان کال په ترڅ کې یې د ۶ میلیون افغانیو په پانګونې دوه ډوله نوي موټر هم جوړ کړي دي.
د ښاغلي بارکزي په وینا، په دې فابریکه کې څلور ۲۴ ډوله بټرۍ هم توليدېږي چې د هېواد په ۲۰ ولايتونو کې پلورل کېږي.
نوموړي زیاته کړې چې د دوی له لوري نوي جوړېدونکي وسایط برېښنايي او پیټرولي دي او ژر به بازار ته وړاندې شي.
د امین نور شرکت په فابریکه کې شاوخوا پنځه سوه تنو ته د کار مستقیم او غیر مستقیم فرصت برابر شوی دی.