تاند (جمعه، د سنبلې ۹ مه) د جرمني د فدرالي حکومت ویاند سټیفن همبستریت په یوه اعلامیه کې رسماً تایید کړه چې خپل هیواد ته یې د افغان پناه غوښتونکو د ایستلو لړۍ پیل کړې ده.
ښاغلي همبستریت بې له دې چې خپل هیواد ته د ایستلو افغان کډوالو د شمېر په اړه جزییات وړاندې کړی، وویل چې دا لومړنۍ ډله ده چې د ۲۰۲۱ کال په اګست کې د طالبانو له واک ته رسېدو وروسته ایستل کېږي.
هغه ایستل شویو افغانانو ته په اشارې وویل: “دا ټول افغانان جنایتکاران وو چې په جرمني کې د پاتې کېدو حق یې نه درلود او د ډیپورټ په حکم کې شامل شول.”
د جرمني حکومت په دې اعلامیه کې د هغو افغان کډوالو په شړلو ټینګار کړی چې په دې هیواد کې په جرمونو کې ښکیل دي.
تر دې مخکې د جرمني د کورنیو چارو وزیرې نانسي فایزر ویلي وو چې برلین له دریمو هېوادونو سره په خبرو اترو بوخت دی چې د طالبانو له حکومت سره د جرمني له مستقیمې اړیکې پرته افغانستان ته د “افغان جنایتکارانو” د ایستلو لارې چارې ومومي.
د جرمني د پریکړې په ځواب کې چې د افغان کډوالو د ایستلو پروسه بیا پیلوي، د طالبانو حکومت غوښتنه کړې وه چې دوی دې دریمو هیوادونو ته ونه ایستل شي او دا مسله دې د ډیپلوماتیکو چاینلونو له لارې حل شي.
د بخښنې د نړیوال سازمان غبرګون
د بخښنې نړیوال سازمان خبرداری ورکړی چې له دغه هیواد څخه د افغان کډوالو ایستل له طالبانو سره د جرمني د حکومت د ښکیلتیا خطر لري.
د بخښنې نړیوال سازمان ویلي چې په جرمني کې د قانون حاکمیت باید له نړیوال قانون څخه د دغه هیواد پیروی تر پوښتنې لاندې نه راولي.
د بخښنې نړیوال سازمان د ۲۸ “جنایتکارو” افغان کډوالو د ایستلو په غبرګون کې د جمعې په ورځ (د اګست په ۳۰ مه) وویل چې په افغانستان کې له عدالت څخه پرته اعدامونه، ورکیدنې، شکنجې او ځورونې معمول شوي دي. دغه دفتر په ضمني ډول د جرمني پر حکومت غږ وکړ چې په هر ډول شرایطو کې د افغان کډوالو له ایستلو ډډه وکړي.