تاند ( ۲ شنبه، د سرطان ۱۱ مه) د کوزې پښتونخوا د کورمې سیمې پر یوه واده د بمي برید له امله لږ ترلږه ۱۹ تنه ټپيان شوي.
ځایي پولیس چارواکو ویلي، چې په ټپیانو کې یو شمېر ماشومان هم شامل دي.
د دوی په وینا، د ټپیانو وضعیت خطرناک نه دی، خو نه ده معلومه چې برید تروریستي که شخصي انګېزه لري.
د واده کوربنو ویلي، چې دوی چا سره شخصي بدي نه لري.
په وروستیو کې د پښتونخوا له ګڼو سیمو د ګڼو ورته پېښو خبرونه ورکول کیږي، چې د ډېرو انګېزه یې شخصي دښمنۍ ګڼل کیږي.
پښتانه ملتپال پاکستاني چارواکي تورنوي، چې پښتنو سیمو کې یې جرګه او نور قبایلي ارزښتونه کمرنګه کړي، خو پر ځای یې د قانون په عملي کولو او د خلکو د ستونزو په حلولو هم پاتې راغلي دي.