تاند (۲شنبه، د جوزا لومړۍ ) د تورخم دروازې لپاره د طالبانو د کمېسارۍ چارواکو ویلي، چې تورخم دروازه د درې ورځني موقت ځنډ وروسته نن دوشنبه د مسافرو پر مخ د پخوا په څیر خلاصه شوه،
یاده لار د جمعې په ماښام پاکستان هېواد له لوري درځو لپاره په موقت ډول تړل شوې وه، چې نن دوشنبه یې د مسافرو پرمخ خلاصه کړه .
تورخم کې د طالبانو کمیسار د دغې لارې د تړل کېدو علت د پاکستان له لوري نویو ودانیو ته د زړو دفترونو انتقالول ښودلی و.
د جمهوري نظام په وروستیو کې پاکستان او افغان چارواکو تورخم کې جوړه شوې دروازه پرانیسته، چې توندو غبرګونونو سره مخ شوه.
د دې دروازې له پرانیستل کېدو وروسته، د دروازې پورې غاړې ته پاکستاني چارواکو ګڼ تاسیسات جوړول پيل کړل، چې اوس بشپړ شوي او عملاً استفاده ورڅخه پيلیږي.
افغان څارونکي د پاکستان دا هڅې او د افغانستان د مخکینیو او اوسنیو چارواکو ناغېړي د ډیورنډ فرضي کرښې د رسمیت موندلو زمینه جوړونکي ګڼي او نیوکې ورباندې لري.