تاند ( جمعه، د ثور ۲۱مه) کاپیسا کې پرون د ګل زرد په نوم د دودیزې مېلې او مشاعرې د ترسره کېدو تر څنګ د ندای حقیقت په نوم د یوې خصوصي راډیو خپرونې پیل شوې.
د طالبانو اطلاعاتو او فرهنګ وزارت ویلي، چې مشاعرې ته د دوی وزیر ملا خیرالله خیرخواه او یو شمېر نور چارواکي هم ورغلي وو.
سرچینې د دغې مېلې او مشاعرې په اړه نور جزیات نه دي ورکړي، خو د وزیر له قوله یې شاعران د دوی د رژیم ملاتړ ته بللي.
په ورته وخت کې له کاپیسا څخه د ندای حقیقت په نوم د یوې نوې خصوصي راډیو د پرانیستې خبر ورکړل شوی.
طالب چارواکو ویلي، چې دغه سيمه ييزه راډيو په ۹۱.۵ «اف.ام» څپو کې اسلامي، کلتوري، ټولنيزې او نورې برنامې خپروي.
اوسمهال د ملي راډيو ټلويزيون په ګډون، په کاپيسا کې څلور راډيوګانې هم نشرات لري.