تاند(شنبه، د حمل ۱۱ مه) د طالبانو حکومت د صرافیانو او د پیسو تبادله کوونکو د کار په اړه یو نوی فرمان صادر کړ.
له دې حکم سره سم، باید ټولې صرافۍ جواز ترلاسه کړي او هغه کسان چې په لارو کې پیسې تبادله کوي، د کار د اجازې لپاره باید کارت ولري.
د طالبانو د حکومت ویندوی ذبیح الله مجاهد د دې پرېکړې هدف په هیواد کې د صرافیو او د پیسو د تبادلې د برخې په کار کې د ښه والي راوستل وباله.
ده همداراز وویل چې د دې فرمان تطبیق به دوی د دې جوګه کړي چې په هیواد کې پر صرافیو ښه کنترول ولري او د هغو اقداماتو مخه ونیسي چې له کبله یې د هیواد اقتصاد ته تاوان اوړي.
د صرافیو اتحادیه د دې کار هرکلی کوي او وايي چې دا به په هیواد کې د پیسو د خدماتو او تبادلې د برخې فعالیتونه منظم کړي.