تاند (شنبه، د حوت ۲۶مه) د ملګرو ملتونو د امنیت شورا د پرون ناوخته غونډې پر مهال، په دغه سازمان کې د روسیې او چین استازو یو ځل بیا د خپلو خبرو پر مهال په کابل کې د طالبانو له واکمن رژیم څخه خپل ملاتړ ته دوام ورکړ.
دغو استازو په بېلابېلو بڼو دا ملاتړ څرګند او د افغانستان په اړه یې د امنیت شورا د وروستني پرېکړه لیک په اړه ملاحظې وړاندې کړې.
په دې غونډه کې د خبرو پر مهال، په ملګرو ملتونو کې د چین د استازي مرستیال گنگ شوانگ ادعا وکړه، چې د طالبانو له بیا واکمنیدو سره په تېرو دوه نیمو کلونو کې افغانستان یو لړ پرمختګونه لري، چې نه د امنیت شورا په پرېکړه لیک او نه د یوناما په وروستني راپور کې یې یادونه شوې.
د هغه په ټکیو، په افغانستان کې له تېرو دوه نیمو کلونو راهیسې طالب چارواکي د داخلي ثبات په ښه کولو، د اقتصادي وضعیت په مدیریت او دغه راز سیمې سره د خپل تعامل په زیاتوالي توانیدلي.
د دې ترڅنګ، په ملګرو ملتونو کې د روسیې د استازي مرستیالې آنا اوستیگنیوا وویل، چې په افغانستان کې له واکمن طالب رژیم سره له تعامل پرته بله لاره نشته.
د نوموړې په وینا، د دې ترڅنګ له افغانستان سره د بشري مرستو په برخه کې نه باید پلمې ولټول شي او په دې مرستو کې کمښت راوستل شي.
د نړیوالو چارو شنونکی ملک ستیز باور لري، چې د امنیت شورا غړي د افغانستان په اړه یوه خوله نه دي، چې دا نا همغږي د طالب رژیم پر وړاندې د واحد نړیوال دریځ په رامنځته کېدو کې خنډ شوی.
له دې سره، هغه د ټولو غړو لخوا د یوناما د ماموریت تمدید ته موافقه رایه ورکول هیله بښونکی ګڼي او وایي دغه اداره کولای شي له افغانستان سره د نړیوالو د اړیکو د پله رول ولوبوي.
افغانستان سره د تعامل په اړه د ملګرو ملتونو د امنیت شورا د پرېکړه لیک جزییات – تاند (taand.net)
طالبانو تر دې دمه، د ملګرو ملتونو د امنیت شورا لخوا د یوناما ادارې د ماموریت تمدید ته غبرګون نه دی ښودلی، خو تر دې مخکې یې د دغې ادارې د کړنو په اړه توندې نیوکې کړې دي.
د یوناما د کلني ماموریت پای ته رسېدل او د کړنو په اړه یې غبرګونونه – تاند (taand.net)